Ang Palitang Smart Connect, na kilala rin bilang Palitan ng Abenida Mindanao at Palitan ng North Luzon Expressway–Daang Palibot Blg. 5, ay isang palitang trebol na may dalawang antas sa Valenzuela, Kalakhang Maynila, Pilipinas na nagsisilbing sangandaan sa pagitan ng Daang Palibot Blg. 5 (C-5) at ng North Luzon Expressway (NLEx). Itinayo ito bilang bahagi ng NLEx–Mindanao Avenue Link na may habang 2.7 kilometro at nagsisilbing karugtong ng mabilisang daanan sa Abenida Mindanao, na sinapi na sa sistemang C-5, at ito ang pinakamalaking palitang trebol sa bansa kung pagbabatayan ang lawak ng lupa.